દરેડ શિક્ષણ અને તાલીમભવનમાં ગાંધીનગરથી આવી તપાસ..

દરેડ શિક્ષણ અને તાલીમભવનમાં ગાંધીનગરથી આવી તપાસ..

 Mysamachar.in-જામનગર:

જામનગર જીલ્લા શિક્ષણ અને તાલીમ ભવનના અધિકારી અને અમુક કર્મચારી દ્વારા નાંણાકીય ગેરરીતિઓ મોટાપાયે આચરવામાં આવી હોવાની સ્ફોટક વિગતો માહિતી અધિકારમાં સામે આવતા અરજદાર દ્વારા થોડા દિવસો પૂર્વે આ મામલે ગાંધીનગર ઉચ્ચકક્ષાએ રજુઆતો કરવામાં આવતા આ બાબતના ઘેરા પ્રત્યાઘાતો પડ્યા છે અને આ મામલે આજે ગાંધીનગરથી તપાસ અધિકારી જામનગર દરેડ તાલીમ ભવન ખાતે તપાસ અર્થે પહોચતા તાલીમભવનમાં ભારે ખળભળાટ મચી જવા પામ્યો છે,

અરજદાર દ્વારા ગાંધીનગર શિક્ષણ સચિવ, નિયામક જીસીઈઆરટી સહિતનાઓને રજૂઆત કરવામાં આવી હતી કે તેમાં સ્ટેશનરી, વાહનભાડાના કોન્ટ્રાક્ટ અને કેટરર્સના કોન્ટ્રાક્ટમા ત્રણ ભાવો લઇ અને જે પાર્ટીનો સૌથી નીચો ભાવ હોય તેણે વર્કઓર્ડર આપવાનો હોય છે, પરંતુ સ્ટેશનરી અને વાહનભાડે રાખવાના કોન્ટ્રાક્ટમા બન્ને કામોમાં કોરા લેટરપેડનો ઉપયોગ કરી અને લાગતા વળગતા ને કામ આપી અને મોટી ગોબાચારી આચરવામાં આવી હોવાની પણ અરજદાર કલ્પેશ આશાણી દ્વારા ચોકકસ આધાર પુરાવાઓ સાથે શિક્ષણમંત્રી અને સચિવને પણ લેખિત રજૂઆત કરાઈ છે, વધુમાં કોન્ટ્રાક્ટમા કમીટીના કોઈપણ સભ્યોની સહી સિક્કા પણ જોવા મળતા નથી, અને ટેન્ડર સમયે કોઈ પાર્ટી હાજર રહેલ હોવાનું પણ મળેલ માહિતી પરથી જણાઈ આવતું નથી, તો તુલનાત્મક પત્રોમાં પણ છેકછાક કરી અને ચેડા કરવામાં આવેલ છે, આક્ષેપ એવો પણ કરવામાં આવ્યો છે કે જે તે પાર્ટીએ કોરા લેટરપેડ આપી અને અધિકારી કનુભાઈ કરકર અમરેલીના હોય તેથી તમામ કોન્ટ્રાક્ટ પણ અમરેલીની પાર્ટીઓને આપી દીધા હોવાનું પણ જાણવા મળે છે,

વધુમાં કેટરર્સના કોન્ટ્રાકટમા પણ કોઈપણ પાર્ટીના ભાવ લીધા વિના લાગતી પાર્ટીને ઓર્ડર આપી ને સરકારના નિયમોનો સરેઆમ ભંગ કરવામાં આવ્યો છે તેવા કથિત આક્ષેપો કરવામાં આવ્યા હતા, આક્ષેપો બાદ આજે જીસીઈઆરટી ના રીડર ચૌધરી જામનગર દરેડ શિક્ષણ અને તાલીમ ભવન ખાતે આવી પહોચ્યા બાદ તેવોએ આક્ષેપ કરનાર કલ્પેશ આશાણી અને જેની સામે આક્ષેપો થયા છે તે કનું કરકર નું નિવેદન નોંધવાની કાર્યવાહી કરી હોવાનું સુત્રોમાંથી જાણવા મળે છે, હવે આ નિવેદનોની કાર્યવાહી બાદ શું તપાસ થાય છે અને શું પગલા લેવાય છે તે જોવાનું રહેશે.