IPS અધિકારીએ દુષ્કર્મ મામલે ઉઠાવ્યા પોલીસની કામગીરી પર સવાલ

IPS અધિકારીએ દુષ્કર્મ મામલે ઉઠાવ્યા પોલીસની કામગીરી પર સવાલ
ફાઇલ તસવીર

Mysamachar.in-અમદાવાદઃ

રાજ્યમાં છેલ્લા ત્રણ દિવસમાં દુષ્કર્મની ત્રણ ઘટનાથી ચારેબાજુ ફીટકારની લાગણી પ્રવર્તી છે અને મહિલાઓની સુરક્ષાને લઇને અનેક સવાલો ઉઠી રહ્યાં છે, ખુદ પોલીસના ઉચ્ચ અધિકારીઓ પણ હવે મૌન તોડી ખુલ્લેઆમ પ્રશ્નો ઉઠાવી રહ્યાં છે. જેમાં સીઆઇડી ક્રાઇમના વુમન સેલના ADG અનિલ પ્રથમે ચિંતા વ્યક્ત કરી કેટલાક વેધક સવાલો કર્યા છે. દુષ્કર્મની ઘટનાથી થરથરી ઉઠેલા અનિલ પ્રથમે ફેસબૂક પર વ્યથા ઠાલવતા લખ્યું કે 'આખા ભારતમાં બળાત્કારના સમાચાર સામે આવ્યા છે, ગુજરાતમાં છેલ્લા 48 કલાકમાં 3 બળાત્કાર થયા છે. મને આઘાત લાગ્યો છે જેથી હું મારી નૈતિક અને બંધારણીય ફરજ સમજી આ મહિલા સશક્તિકરણ મુદ્દે મારો અભિપ્રાય વ્યક્ત કરી રહ્યો છુ કે. હું વુમન સેલના ADG તરીકેનો હોદ્દો 2012થી સંભાળું છુ, શું મહિલા સશક્તિકરણ તેમની પ્રાથમિકતામાં નથી ?, શું શહેરો અને જિલ્લાઓના સીપી અને એસપી માટે સરકાર દ્વારા ચાલતી ઉપરોક્ત યોજનાઓ અને પ્રયાશો પર્યાપ્ત નથી?, રાજ્ય અને કેન્દ્ર પાણીની માફક પૈસા મહિલાઓની સુરક્ષા અને સશક્તિકરણની યોજનાઓ પર વાપરી રહી છે છતાં પોલીસ નિષ્ફળ કેમ છે અને કેમ પોલીસ નાગરિકો સાથે સંવાદ સાધવામાં નિષ્ફળ છે?''

એડીજી અનિલ પ્રથમે પોતાની ફેસબુક પોસ્ટમાં સરકાર દ્વારા મહિલાઓના સશક્તિકરણ માટે ચાલતી ઢગલાબંધ યોજનાઓનો ઉલ્લેખ કર્યો છે. જેમાં 181 મહિલા હેલ્પલાઇન, મહિલા સુરક્ષા સમિતિ, ફ્રેંડ્સ ફોર વુમન એન્ડ ચાઇલ્ડ, મહિલાઓ પર થતાં અત્યાચારની તપાસ શાખા, જેન્ડર રિસોર્સ સેન્ટર, સુરક્ષા સેતુ, કોઓર્ડિનેશન વીથ NGO, ગુડ એન્ડ બેડ ટચ જેવી સરકારની યોજનાઓનો ઉલ્લેખ કરતા રાજ્યની કાયદા વ્યવસ્થાની જવાબદારી સંભાળનાર તમામ કમિશ્નર અને એસપીને સીધો પ્રશ્ન કર્યો કે મહિલા સુરક્ષા, સંરક્ષા અને સશક્તિકરણ તેમની પ્રાથમિકતાની યાદીમાં કેમ મોખરે નથી? તો એક ગુજરાતી ન્યૂઝ ચેનલ સાથે વાતચીતમાં અનિલ પ્રથમે જણાવ્યું કે હું અંગત રીતે અનુભવું છું કે શહેરોમાં અને જિલ્લાઓમાં મહિલા સશક્તિકરણને પ્રાથમિકતા આપવામાં આવતી નથી, પોલીસ પાસે ઘણું કામ હોય છે, પરંતુ આ કામ પ્રાથમિકતામાં નથી. મેં જોયું છે કે CP અને SP મહિલા સશક્તિકરણને તેમની પ્રાથમિકતામાં રાખતા નથી, તેથી નિષ્ફળતા દેખાઇ રહી છે.