હર્બલ પ્રોડક્ટના ઓથા હેઠળ આલ્કોહોલયુકત પીણાની બોટલોનો વેપાર ઝડપાયો 

વેલ્ડીંગ વર્કસની દુકાનમાં ચાલતો હતો વેપાર વાંચો વધુ વિગત 

હર્બલ પ્રોડક્ટના ઓથા હેઠળ આલ્કોહોલયુકત પીણાની બોટલોનો વેપાર ઝડપાયો 

Mysamachar.in-આણંદ

આણંદ જીલ્લાના પેટલાદ તાલુકાના રંગઇપુરા ગામે છેલ્લા ત્રણેક મહિનાથી આયુર્વેદિક સીરપ હર્બલ પ્રોડક્ટના ઓથા હેઠળ ગામડાની ભોળી પ્રજા તથા યુવાધનને શારીરીક તથા આર્થિક રીતે પાયમાલ કરતા નશાયુક્ત આર્યુવેદિક સીરપનો વેપાર કરતો વેપારી ઝડપાયો છે. પ્રાપ્ત માહિતી મુજબ, આણંદ એલસીબી ટીમને બાતમી મળી હતી કે, પેટલાદ ટાઉન પોલીસ મથકની હદમાં આવેલા રંગાઇપુરા ચોકડી પાસે હિરેન વેલ્ડીંગ વર્કસની દુકાનમાં માનવ સ્વાસ્થ્યને હાનિકારક આલ્કોહોલયુક્ત હર્બલ પીણાંનો વેપાર થઈ રહ્યો છે. જે અંગે એલસીબી ટીમે દરોડો કરતા ત્યાં ગોપીચંદ દિવાનચંદ સામતાણી ગેરકાયદેસર રીતે આયુર્વેદિક આલ્કોહોલયુક્ત પીણાંનો વેપાર કરતા ઝડપાઈ ગયો હતો. જેની પૂછપરછ કરતા તે હાલ નડિયાદમાં પ્રભુકૃપા સોસાયટી ખાતે રહે છે અને મૂળ રાજસ્થાનના ભીલવાડા જિલ્લાના શાહપુરા ગામનો રહેવાસી છે.

આ દરોડામાં એલસીબી ટીમે દુકાનમાં ફ્રિજમાંથી તથા ખાખી પુઠાના બોક્સમાંથી આશરે 37 હજાર 420ની કિંમતના કુલ 257 નંગ આયુર્વેદીક કેફીપીણાની બોટલો તથા વકરાના રૂપિયા 18 હજાર 900 મળી કુલ 56 હજાર 320નો મુદ્દામાલ ઝપ્ત કર્યો છે. આ તબક્કે એફ.એસ.એલ. અધિકારી દ્વારા પણ નમૂના લેવાયા હોઈ તેનો રિપોર્ટ આવે આ વેપારી તથા આ જથ્થો પુરો પાડનાર તથા આ આર્યુવેદીક કેફી પીણુ બનાવનાર તથા વેચનાર વિરુધ્ધ કાયદેસર કાર્યવાહી હાથ ધરાશે.