Mysamachar.in-વડોદરા
સરકાર પાસેથી લાખોનો પગાર મેળવવા છતાં પણ સરકારી અધિકારીઓ અને કર્મચારીઓનું કેમ પણ પેટ જ નથી ભરાતું અને લાંચ લેતા વિવિધ વિભાગોના અધિકારીઓ સકંજામાં આવી જાય છે, આવો જ વધુ એક કિસ્સો વડોદરામાં સામે આવ્યો છે, હાલોલના બાસ્કા ગામમાં આવેલી એક કંપનીમાં સર્ચ કર્યા બાદ કંપનીને સીલ નહી મારવાના બદલામાં સેન્ટ્રલ જીએસટીના અધિક્ષકે રૂા.10 લાખની લાંચની માંગણી કરનાર સેન્ટ્રલ જીએસટીના અધિક્ષક (વર્ગ-2) અને ઇન્સ્પેક્ટર (વર્ગ-3)ને રૂા. 2.50 લાખની લાંચ લેતા ઝડપાયા હતા.
સેન્ટ્રલ જીએસટીના અધિક્ષક નીતીનકુમાર રામસિંગ ગૌતમ તેમજ અન્ય કર્મચારીઓએ તા.15 જુને મિનરલ વોટર, નમકીન અને સોફ્ટ ડ્રિક્સનું પ્રોડક્શન કરતી પ્રાઇવેટ લીમીટેડ કંપનીમાં સર્ચ કરી પંચનામુ કર્યું હતું. જીએસટી વિભાગે ત્યાર બાદ કંપનીના વેપારીને સમન્સ આપીને તા.22મીએ હાજર રહેવા માટેનું જણાવ્યું હતું. જે તે સમયે અધિકારી નીતીનકુમાર રામસિંગ ગૌતમેજણાવ્યું હતું કે, જો રૂપિયા આપશો તો વાત થશે અને કંપનીને સીલ નહીં મારીએ. જેના બદલામાં રૂા.10 લાખની માંગણી કરી ઓફિસમાં ઇન્સ્પેક્ટર શિવરાજને આપવા કહ્યું હતું.
કંપનીમાં સર્ચ સમયે વેપારી પાસેથી અધિક્ષકે રૂા.50 હજાર લીધા હતા. અધિકારીએ રૂા.10 લાખની માંગણી કરતા વેપારીએ એસીબીમાં ફરિયાદ નોંધાવી હતી. દરમિયાનમાં અધિક્ષકે વેપારીને લાંચની રકમના રૂા.2.50 લાખ ઇન્સ્પેક્ટર શિવરાજ સત્યનારાયણ મીણાને આપી દેવાનું જણાવ્યું હતું. સુભાનપુરા સ્થિત સીજીએસટીની કચેરી છટકુ ગોઠવી અધિક્ષક નીતીન ગૌતમ અને ઇન્સ્પેક્ટર શિવરાજ મીણાને લાંચ લેતા રંગેહાથ ઝડપી પાડયા હતા. રેડ બાદ બન્ને અધિકારીઓના ઘર સહિતના સ્થળો પર એસીબી દ્વારા સર્ચની કામગીરી હાથ ધરવામાં આવી છે.