સિવિલ હોસ્પિટલમાં પોલીસને ધક્કો મારી ત્રણ આરોપી ફરાર

સિવિલ હોસ્પિટલમાં પોલીસને ધક્કો મારી ત્રણ આરોપી ફરાર

Mysamachar.in-અમદાવાદઃ 

એક તો મહામહેનતે ક્રાઇમ બ્રાંચની ટીમ આરોપીઓને પકડતી હોય છે, પરંતુ પકડાયેલા આરોપીઓ બેદરકારીનો લાભ લઇને નાસી છૂટે ત્યારે સમગ્ર પોલીસબેડાને શરમની લાગણી અનુભવવાનો વારો આવે છે. આવું જ બન્યું છે અમદાવાદ પોલીસ સાથે. ક્રાઇમ બ્રાંચ દ્વારા મહામહેનતે આખી ચોર ટોળકીને પકડી સ્થાનિક પોલીસને સોંપવામાં આવી હતી, પરંતુ સ્થાનિક પોલીસની બેદરકારીએ ત્રણ આરોપીઓ પોલીસને ધક્કો મારી ફરાર થઇ ગયા. એક તો ક્રાઇમ બ્રાંચની મહેનત એળે ગઇ તો બીજી બાજુ પોલીસની આબરુના લીરે લીરા ઉડ્યા અલગથી.

પ્રાપ્ત વિગત પ્રમાણે અમદાવાદ ક્રાઇમ બ્રાંચે છ દિવસ પહેલા ચોરીની અનેક ઘટનાઓેને અંજામ આપવાના આરોપસર એક આખી ગેંગની ધરપકડ કરી હતી. ધરપકડ કરાયેલા ચારેય શાંતા જીતુભાઇ કેવટ, જીતુ કેવટ, લોકેશ કેવટ, રાજુ કેવટ નામના આરોપીઓ ને ક્રાઇમ બ્રાંચે ચાંદખેડા પોલીસને સોંપ્યા હતા. ત્યારબાદ ચાંદખેડા પોલીસ દ્વારા રૂટીન કાર્યવાહી પ્રમાણે તમામ આરોપીઓના મેડિકલ ટેસ્ટ માટે સિવિલ હોસ્પિટલ લઇ જવાયા હતા, જો કે આ દરમિયાન ઢીલા પોલીસબંદોબસ્તનો લાભ ચોર ટોળકીએ લીધો અને પોલીસ જવાનને ધક્કો મારી ત્રણ આરોપીઓ ફરાર થઇ ગયા.

ચાંદખેડા પોલીસ દ્વારા ચારેય આરોપીઓના મેડિકલ ટેસ્ટ કરાવવા માટે રાતે 10 વાગ્યાની આસપાસ નવી સિવિલ હોસ્પિટલ ખાતે લઇ જવામાં આવ્યા. જો કે આ પોલીસ ટીમ દ્વારા આરોપીઓને હોસ્પિટલમાં બેસાડવાની જગ્યાએ નીચે પાર્ક કરેલી પોલીસની મોબાઇલવાનમાં બેસાડ્યા હતા. આ દરમિયાન જીતુ અને લોકેશ અને અન્ય એક આરોપી પોલીસકર્મીઓને ધક્કો મારી ફરાર થઇ ગયા હતા. બાદમાં પોલીસ ટીમે આમ તેમ ફાફા માર્યા પરંતુ આરોપી હાથ લાગ્યા નહીં, સમગ્ર ઘટના અંગે શાહીબાગ પોલીસ સ્ટેશનમાં ફરિયાદ દાખલ કરવામાં આવી છે અને ફરાર આરોપીઓને પકડવા માટેની તજવીજ હાથ ધરવામાં આવી છે. તો આરોપી ફરાર થઇ જવાની ઘટનાએ શહેરમાં ભારે ચર્ચા જગાવી.