સેલ્ફી લેવાના ચક્કરમાં જીવ ગયો, તમે પણ સેલ્ફી લેવા અધીરા ના બનશો

Mysamachar.in-દીવ 

આજે જેમના હાથમાં જુઓ સ્માર્ટ ફોન અને તેમાં પણ સારા કવોલીટીના કેમેરા...એટલે જ્યાં જુઓ ત્યાં સેલ્ફીનું ચાનક ચઢે છે, સેલ્ફી લેવામાં કોઈ વાંધો નથી પણ સેલ્ફી લેતા સમયે આગળ પાછળ ઉપર નીચે સામે આજુબાજુની ગતિવિધિઓ પર ધ્યાન ના રહે તો ક્યારેક જીવ પણ જાય....અને આવા કેટલાય દાખલાઓ મૌજુદ છે, ક્યારેક ટ્રેનના પાટા પર તો ક્યારેક કોઈ ઉંચી ઈમારત પરથી સેલ્ફી લેવા સમયે લોકોના જીવ ગયા છે, છતાં પણ સેલ્ફીની ઘેલછા જતી નથી એવામાં દીવના દરિયામાં એક કરુણ કિસ્સો સેલ્ફીને લઈને સામે આવ્યો છે, જેમાં યુવકે જીવ ગુમાવી દેવાની નોબત આવી છે.

દિવના નાગવા બીચ પાસે સામે આવ્યો છે. જેમાં સેલ્ફી લેવાના ચક્કરમાં યુવકે પોતાનો જીવ ગુમાવ્યો છે. નાગવા બીચ પાસે સેલ્ફી લેવાના ચક્કરમાં સુત્રાપાડાના યુવાનનો પગ લપસ્યો હતો અને જેના કારણે તે દરિયામાં ગરકાવ થઈ ગયો હતો. બાદમાં યુવકનો મૃતદેહ મળી આવ્યો છે.આ ઘટના અંગે મળતી માહિતી પ્રમાણે મિત્રો સાથે દીવના નાગવા બીચ ફરવા આવેલા 38 વર્ષીય સુત્રાપાડાના યુવાનનું દરિયામાં ડૂબી જવાથી કરૂણ મોત નિપજ્યું છે. આંધ્ર પ્રદેશનો યુવક દુર્ગા પ્રસાદ વેંકટરાવ ગેરડી સૂત્રાપાડાની ખાનગી કંપનીમાં નોકરી કરતો હતો અને રજાઓના દિવસોમાં તે મિત્રો સાથે ફરવા બીચ પર આવ્યો હતો.

નાગવા બીચમાં મિત્રો સાથે દરિયામાં ન્હાવા ગયા ત્યારે સેલ્ફી લેવાની ઘેલછાએ યુવકે જીવ ગુમાવ્યો હતો. જાણવા મળી રહ્યું છે કે આ યુવક સેલ્ફી લેતો હતો ત્યારે દરિયાના પ્રચંડ મોજાએ થપાટ મારતા તેનો પગ લપસ્યો હતો અને જોતજોતામાં તે દરિયામાં ડૂબી ગયો હતો.યુવક દીવમાં ડુબી જતાં તાત્કાલિક ધોરણે સ્થાનિક વોટર સ્પોર્ટ્સ દ્વારા તેનું રેસ્ક્યુ કરવામાં આવ્યુ હતું. દરિયામાંથી બહાર કાઢીને યુવકને 108 દ્વારા દિવની સરકારી હોસ્પિટલમાં ખસેડવામાં આવ્યો હતો. જો કે હોસ્પિટલના ફરજ પરના તબીબે તેને મૃત જાહેર કર્યો હતો. પોલીસે મૃતદેહનો કબજો મેળવીને તેને પી.એમ અર્થે મોકલ્યો છે. તેમજ આગળની કાર્યવાહી હાથ ધરી છે.