અહી પોલીસે માથા બાંધ્યા સાફા અને જાનૈયા બની કારણ કે...
10 હજારનું ઇનામ પણ હતું...
Mysamachar.in:દાહોદ
આમ તો સામાન્ય રીતે પોલીસની આગવી ઢબની પૂછપરછ વધુ ચર્ચાઓમાં રહેતી હોય છે પણ ક્યારેક કોઈ શાતીર અપરાધીને પકડવા પોલીસને પણ નાકે દમ આવી જતો હોય છે, આવું જ એક કિસ્સામાં થયું જેમાં આરોપીને ઝડપી પાડવા પોલીસને માથે સાફા બાંધી અને જાનેયાઓનું રૂપ ધારણ કરવાની ફરજ પડી...વાત એવી છે કે... દાહોદ જિલ્લાના 136 ગુનામાં વોન્ટેડ મધ્ય પ્રદેશનાં ગોવાળી પતરા ગામના પીદીયા રતના સંગાડિયાને ઝડપી લેવા પોલીસે છેલ્લાં એક માસથી કમર કસી હતી. રવિવારે પીદીયો ખરોદા ગામની આલની તળાઇના જંગલમાં આવવાનો હોવાની બાતમી મળી હતી. જેથી તે છટકી ના જાય તે માટે પોલીસે જાનૈયા બનીને જવાનો પ્લાન ગોઠવ્યો હતો.
તાત્કાલિક અસરથી ડી.જે મંગાવી જીપ, ક્રુઝર, બાઇક સહિતના ખાનગી વાહનો તૈયાર કરી તેની પર વર અને કન્યાના નામના ડમી સ્ટીકર પણ ચોંટાડ્યા હતાં. અને પી.એસ.આઈ. સહીત 23 કર્મચારીઓને જાનૈયા બનાવ્યા હતાં. બોરડીથી ડીજે વગાડતાં નાચતા ગાતાં આલની તળાઇ જઇ જંગલમાંથી પીદીયાને ઝડપી લીધો હતો. નોંધનીય છે કે તપાસમાં તેની સામે વધુ નવ ગુના નીકળતાં કુલ 144 ગુનામાં તે વોન્ટેડ હોવાનું સામે આવ્યુ હતું. તેના માથે 10 હજારનું ઇનામ હતું. આમ એક શાતીર શખ્સને ઝડપી પાડવા પોલીસે કરેલ મહેનત અંગે રંગ લાવી અને ગુન્હેગાર ઝડપાઈ ગયો છે.
